Thursday, March 29, 2007

محاولات محاولات




في البداية اقتبس جملة بدأت بها طهقانة البوست السابق " اللي مش طبيعي... انك تلاقي راجل كهل عدا الاربعين و لسة بيراهق "
دايما بتحسسيني يا حياتي أن الواحد بعد السن ده خلاص..أصبح اكسبباير يروح يندفن ، مع ان الجملة دي ممكن تقتل أي شعور للألفة والمحبة بيننا ، وهذا ما لا اسمعه من اليسا وهايفة ونانسي.. دايما بيغنوا لي وما بتفرقش معاهم سني وبيدلعوني على طول الخط، عرفتي ليه بأهرب إليهم !.

وعلى السريع كده احب اذكرك بالتقرير اللي طلع يقول أن هناك سبعين ألف حالة طلاق في الزيجات المصرية بسبب الثلاثة سابقات الذكر أعلاه ، وان الزوجات المصريات مش قادرين يوصلوا لهذه المرحلة من الانوثة.

لا أنكر أنك بتحاولي تملي عينيا رغم إن " مايملاش عين الرجالة إلا التراب" حسب مقولتك الدائمة في أي نقاش ودي بيننا ، ولكنك بتحاولي برضه علشان عنيا ما تزوغش على فتيات الفيديو كليب ،اللي "مالهومش أهل يلموهم "(حسب مقولتك برضه) لكن الفرق يا حبيبتي ، إن فتيات الفيديو كليب يتبعوا أساليب كثيرة ومكثفة للوصول إلى هذه النتيجة الساحقة ، إنما وانا معاك يا حياتي .. بأشوف فقط الأساليب .... ومافيش أي نتيجة.

يعني طقوسك اليومية قبل النوم للحفاظ على بشرتك ، وصندوق الكريمات اللي بتدهني بيها ، وكل انبوب كريم خاص بمنطقة معينة..ده غير الجلسرين وكريم نيفيا علشان محاربة القشف ، ناهيك عن حجر الجلخ.

بالإضافة إلى كمية بكر الريلو ومشابك الغسيل والدبابيس اللي عاملة زي اسياخ الكفتة اللي بتحطيها في شعرك يا روحي واللي كانت هاتخزق عنيا في ليلة من الليالي وانا باتقلب .غير ريحة زيت الشعر دابر أملا ، اللي بيسبب لي عمى مؤقت .

والا ناسية اليوم اللي رجعت فيه متأخر ولاقيتك نايمة ، وانا لا بيا ولا عليا ومش واخد خوانة ، وداخل اتسحب إلى السرير علشان ماصحكيش ، وكان هايجيلي سكتة قلبية لما اتقلبتي فجأة ... ولاقيتك عاملة ماسك الجبنة والزبادي والخيار ... مع عودين نعناع علشان النكهة!

يا حبيبتي..انا طبعا لا انكر كل محاولاتك للتجميل وتنعيم البشرة علشان توصلي لنعومة هايفة ، بالإضافة إلى اني طبعا احب اشوفك رشيقة في رشاقة إليسا وفي خفة ماريا ودومنيك ، ولكن ، ارجوك ارحميني شوية من شوربة الكرنب اللي بتضربيها ليلاتي على العشا ، قال أيه ... رجيم ، يا حبيبتي الاوضة بتنقلب بالليل إلى صالة مغطاة يتم فيها افتتاح دورة الألعاب الاولمبية فيها كل انواع الألعاب النارية والصواريخ .
مع الريحة بقا..ماقولكيش ...بتعمل شغل ...جنااااان.

وبمناسبة الأصوات... تقدري تنكري كام مرة نصحتك إننا نزور طبيب أنف وأذن وحنجرة.. ! وعلى فكرة ، بعد زواجي عرفت ليه خلوا التخصصات التلاتة دول مع بعض ، كان من الأفضل يسموه اختصارا دكتور شخير ،

وكله كوم وليلة ما رفضتي تنامي إلا لما تخلصي قراءة مغامرة الشياطين التلاتاشر بتاعة ادهم صبري، ويوميها تركت لك الميدان ... تطاردي انت الشياطين في كوابيسك وانزويت انا في ركن من السرير كالشاويش فرقع ، خوفا من ضرب النار والنبابيت... والشلاليت ، هل كانت مصادفة ان تأتي بكل العصيان اللي في البيت وتحطيهم على السرير ليلتها؟

واخيرا اسألك يا حبيبتي.. هل كانت مصادفة برضه ، لما أكون قاعد بأدندن باغنية " إن ما كنتش إنت تدلعني ...مييين هايدلعني ...؟ " ، تقومي انت بصنعة لطافة وتحطي السي دي بتاعة أصالة.... آااااسفة ....شوفلك غييييري .... ! "

Posted by طهقان :: 10:01 AM :: 37 Comments:

Post a Comment

---------------------------------------