Monday, July 30, 2007

شكر وتقدير

أولا إلى الفنان أشرف حمدي

على تعبه ورسمه و إهدائه الصورتين اللي في منتهى الجمال واللي يعبروا قد ايه هو فنان كاريكاتير ذو حس كوميدي رائع، بس مش عارف..مع أنه ماشافنيش قبل كدا..بس سبحان الله ..الخالق الناطق


طهقان و طهقانة
________________________________


ثانيا : منتديات حبيبتي يا مصر



وخاصة العضوة
ayousha


إللي بعتت لي إيميل تستأذن فيه بطريقة حضارية كلها ذوق لنشر مذكراتنا في منتداها.


والتي بدأت أول موضوع في اليوميات بهذه الكلمات الرقيقة ...



بالجمل ديه بداء طهقان وطهقانة كتابة يومياتهم ومشاكلهم بطريقة هزلية ساخرة لفتت انتباه الكثير من مرتادى النت ومرتادى المدونات ، قدر طهقان وطهقانة خطف الانظار وتسليط الضوء على مشاكلهم ومشاكل كتير بتقابل المجتمع المصرى من خلال الاطار الساخر ده اللى بقى ليه معجبينه وعشاق تدوينتهم ومن شهرة الموضوع مكنش ينفع ميبقاش لينا حظ فى شرف وضع مدونتهم عندنا لنقراءها سويا ونستمتع معا بعمل جميل للغاية من بنات افكار زوجان مصريان يتمتعان بخفة دم مذهلة وانما ليست بجديدة على المصريينوارجو ان يسمحوا لنا بذلك....:وبجد انا بشكرهم على الروائع اللى كتبنها


فلها مني كل التحية والإجلال

Posted by طهقان :: 9:44 AM ::
---------------------------------------

Wednesday, July 25, 2007

وأحتكم الأمر..وهأتجوز


من فترة طويلة ، انتهزت جلسة صفا بيني وبين طهقانة ، وقعدنا نتناقش في شوية أمور ، وتطرقنا إلى مسألة جواز المسيار والجواز العرفي والجواز فريند ، والتعدد ، وبعد فترة تمهيد ليست بالقصيرة دخلت في الموضوع مباشرة:

أنا : أنت طبعا عارفة أن الشرع بيسمح للراجل بالتعدد ودي لحكمة من عند الله سبحانه ، لمحاربة العنوسة وتشرد اليتامى والمنكسرين واشياء كتيرة
طهقانة : طبعا ، وماحدش يقدر يعترض على تشريع ربنا .
: أكيد ، وزي ما الشرع بيبيح لك اني بعد ما اموت لك الحق تتجوزي واحد تاني، مع اني كنفس بشرية مش قادر أستوعب الفكرة دي أو أقبلها ، انما ..ضروري أطوع اهوائي الشخصية لشرع الله واقبل الفكرة واسلم بها .
:
قصدك أيه ؟؟
: يعني انا عارف انها مش سهلة عليك اني اتجوز تاني...بسبب الغيرة الفطرية عند المراة، بس لازم تقبلي بشرع الله .....يعني ...بصراحة .... أنا عايز اتجوز .
: بقا اللف والدوران دا كلوا علشان تقولي انك عايز تتجوز...طيب ما كنت تقول كدا من الأول..انا في ديك الساعة لما تطلب مني انك تتجوز ..


: هـــا ه !!!!

شوف بقا . انا ماعنديش اي مانع ، هو في حد يقدر يعارض في شرع ربنا ، طالما انك هاتقدر تعدل بيننا ..زي ما ربنا بيقول يبقا ليه لأ.

: طهقانة ..اسمحي لي اعتذرلك ، انا ما كنتش عارف انك قلبك كبير قوي كدا ، ومخك كمان كبير .وانت عارفة طبعا أن مش شرط يعني الزواج من تانية أن يكون هناك عيب في الاولانية ... بالعكس.. انت الاصل ، وعلى العين والراس.... وربنا يقدرني واعدل بينكم.

· انا عارفة انك قدها وقدود يا عمري ... وجوازك هايكون على ايدي انا ..انا اللي هأختار لك ...
· نعاااام ؟ قصدي يعني ...تختاري لي دا ايه .... !! ما تتعبيش نفسك ..أنا هأعرف أختار لنفسي .لازمته ايه ادوخك معايا
· لا يمكن .. مش انت عايز تتجوز علشان تطبق حكمة ربنا في التعدد ..يبقا ماحدش هايجوزك غيري... على الاقل علشان أشاركك الثواب
......................................................

وبعد ردح من الزمن عادت طهقانة وفتحت الموضوع من جديد ...


: طوطو يا حبيبي..انا عندي ليك مفاجأة حلوة... انا خلاص أخترت لك عروسة ..إنما أيه...! بنت منكسرة وغلبانة ، وتتحط على الجرح يبرد.... ومن قرايبنا... اللي في البلد ... الصعيد .. أبوها مات وسابها لوحدها... ودي أنسب واحدة علشان تحارب بيها العنوسة والتشرد الأطفالي. ..ايه رأيك في هنية ...
: هنية مين ....! بنت عم عبد القادر الله يرحمه .! (المفاجأة ألجمت لساني)
: هي بعينها... يعني البنت في بالك اهيه !! أخ منك أنت أخ ، والمفأجأة بقا أنها جاية بكرة من البلد ...
انا عزمتها عندنا كام يوم علشان تتعرفوا على بعض عن قرب ، ونفاتحها في الموضوع .

· ومالك مستعجلة على ايه ... !
· خير البر عاجله...

................................

:إزيك يا هنية ... البقاء لله ، في وفاة الوالد.
: الله يسلمك يا طهجان بيه ، مانجلكمش في حاجة وحشة ، جدر ومكتوب يا بيه ، ابويا عبد الجادر كان زينة الرجال ، ما عيتخيرش عنيك واصل .

: شوفي يا هنية ، انت زي أختي وأنا مش هألاقي أحسن منك لجوزي..علشان أجوزهولك واطمن عليك معاه وعليه معاكي
: كلام أيه دا اللي عاتجوليه يا إست هانم ! أنا ماجدرش أتجوز جوزك، يا سنة سوخة يا ولاد ..وانت بنفسك اللي عاتجولي إكده يا إست طهجانة !!!


: اسمعي اللي بأقولك عليه يا بنتي..دا شرع ربنا..!
: جادر على كل شيء....حدانا في البلد كانوا بيجولو لي إني موسعدة ورزجي واسع ، وعلى كلن في الاخير. .الجرار جراركم .
:جلت إيه يا طهـ...قصدي ..قلت أيه يا طهقان !؟
:أنا أجدر أجول....حاجة بعد كلمتك يا روحي....خلاص الخيرة فيما اختاره الله .
طهقانة: الفرح الخميس الجاي..
هنية: لووووووولي

............................................


جهزت طهقانة العشاء بالكامل، وعملت العصير ، وقدمته لنا وأخلت لنا الجو ،

فيها الخير والله ..بنت حلال...(ناس طيبين قوووووي) ماكنتش عارف ان عقلها كبير للدرجة دي...
وبدأت مرحلة جديدة من حياتي..... تبدأ مباشرة بعد العشاء الفخم ، والعصير الطازج، وبعض الجمل الترحيبية الروتينية ، وبعض المقدمات التي لابد منها ،

* باقولك ايه يا هنية ،
* جول يا سيد الرجالة ، انا ملك إيديك ..!
* عايزك كده ترفعي التكليف وتاخدي راحتك على الاخر. .. ! انت هنا ست البيت .

وأطفأت النور
.....................

أشعلت النور
: الله.... هو اللي بنعمله في الناس هايطلع علينا والا ايه ؟؟؟؟
الواحد الظاهر أعصابه تعبانة شوية من السهر والفرح والدوشة


هنية: معلهش يا وِلد عمي .. تلاجيك تجلت في العشا ، استهدى بالله وكل شئ هاينصلح حاله.


:خلاص يا هنية ... الظاهر مافيش فايدة (عملتها طهقانة بالعشا المفخخ بتاعها ، والله أعلم حطت فيه أيه)


......................

يأتيني صوت طهقانة من خارج الغرفة ..

يا حبيبي...العبرة في الصلابة ...!

وزي ما ربيتك انت واخواتك ، لازم تبقى صلب على موقفك ، وتستمر ، طالما اتخذت قرار لازم تصمد وتصمم عليه ،
هانتكلم في الموضوع دا بعدين ، روح دلوقت صحي أبوك أحسن زودها النهاردة في النوم ، وهايتأخر على الشغل .
والا خليك ..هأصحيه أنا..

قوووم يا طهقان...
: صباح الخير يا حياتي...
خير اللهم اجعله خير.....تصدقي يا طهقانة أني حلمت اني بأتجوز... !
* نعم يأخوووويا ...... نهارك مش فايت ، تتـ إيه ...تتجوز.....تتجوز عليا ... يا نهارك الاسود يا طهقاااانة

Posted by طهقان :: 12:24 PM :: 64 Comments:

Post a Comment

---------------------------------------

Sunday, July 8, 2007

أنا وعبير

- انت راجل ماعندكش ذوق
- انت ست معفنة
- راجل معندكش نظر ومش بتقدر
- انا مش شايف أي حاجة تتقدر
-
أنا اللي غلطانة إني...
-
طبعاً هو واحدة زيك تعمل حاجة مش غلط .
- احترم نفسك ، انت مابتعرفش تعامل الستات.
- هما فين الستات...! دا انتي بالكتير.. انثى الكركدن
-
قليل الادب

- انا مش عارف طهقانة إزاي تصاحب ستات أرجوزات زيك

نرجع فلاش باك للموضوع دا من البداية ،

بعد فترة تمهيد استمرت لعدة ايام ، سمعت خلالها من
طهقانة كلمات كتير غير مترابطة حاولت تدخلهم في مواضيع متفرقة ، على شاكلة ، نيوو لوك ، اي لاينر ، شادو ، ماش ، سليكون، برونز ، نفخ ..... شفايف .
واخيرا وبعد فترة التمهيدي..قصدي التمهيد ، التي استمرت لعدة ايام ، استأذنت طهقانة مني انها هاتتاخر اليوم دا بحاله خارج البيت مع صاحبتها عبير، هاتروح تغير جو في هايبر ماركت ، وتعمل شبوينج هي وصاحبتها ، وهايعدوا في طريقهم على البيوتي سنتر ،

أنا :
طيب لازمته ايه تروحي البيوتي سنتر ، ما أحنا ناخد الشاي هنا في البلكونة احسن..بدل الكافيهات والمصاريف .
طهقانة : يا حبيبي...البيوتي سنتر. دا يعني مركز تجميل ،

أنا :
أه..المزين يعني ... ما انا عارف... بس مش مركز معاكي .. طيب وتروحي لمركز تجميل ليه... ما انت حلوة طبيعي يا روحي ..!
طهقانة : لما ارجع هاتشوف .
أنا : اعملي اللي انت عايزاه ..بس اهم حاجة لازم تعرفي اني باحبك زي ما انت ، اياكي تغيري في أي حاجة ، و اوعي تقصي شعرك ألا جارسون.. انا باحبه طويل ، ولازم تعرفي انك اجمل واحدة في عينيا .
طهقانة : حاضر.. انا اتفقت انا وعبير اننا نعمل نيو لوك.
أنا :
ربنا يوفقكم.

رحعت أخر النهار ، ولاقيت حاجة قاعدة في الانتريه قدام التليفزيون ، ماتعرفش بقا إذا كانت انثى ، او أخطبوط او شوال رز عدى عليه موتوسكل ، ومع بعض الحسابات الميتافيزياقية البسيطة ، وقياس بعض الابعاد الهندسية ، ادركت انها واحدة ست،

.......
ياااه...إزاي فاتت علي الحكاية دي !!

دي عبير صاحبة طهقانة ، بصراحة كنت اول مرة اشوف فيها عبير دي ، أومال طهقانة كانت طالعة بيها السما ، ودايما تكلمني عن شياكتها وذوقها، دي لا طلع عندها لا ذوق ولا شياكة ، وطهقانة كمان ، بالشكل دا تبقا عديمة الذوق ،

شعرها كأنه اناناسة طالع لها بتنجناية، أو زي ما يكون كيس مخدة قطن لسه خارجة من تحت إيد المنجد. او كأنها شخصية كارتونية هربانة من قناة سبيس تون .

وأيه كمية الالوان اللي في شعرها دا ... عاملة زي البغبغان المنتوف ، تيجي ايه دي في حلاوة وجمال ورقة طهقانة ... صحيح ..صدق اللي قال ... "اللي يشوف مرات غيره ...تهون عليه مراته ".

وبمجرد ما نظرت إليها ..اتخضيت ، لدرجة أني حاولت اقول اي دعاء من اللي حافظهم ، فلم يأتي على لساني إلا دعاء " اللهم إني اعوذ بك من الخبث والخبائث "
انا: مساء الخير... اسف أني دخلت على غفلة .. اتفضلي خدي راحتك ..البيت بيتك.

الست عبير اول لما شافتني ، ابتسمت ابتسامة خبيثة ذات مغزى ، واطرقت عينيها في تصنع واضح للخجل ، واختصارا للكلام الكتير والوصف، (تخيلوا معي ، عائشة الكيلاني لما تتكسف) .

أنا : (يا مغيث ، انا عارف الجماعة بتوع مكافحة الحيوانات السايية سايبينك ليه ؟ ) أومال طهقانة سايبة حضرتك لوحدك ليه ؟
عبير(بدلع): ما تقعد ..انت عامل فرق ليه !؟؟

هي فاكرة نفسها ايه ، اينعم الواحد ساعات عينيه بتزوغ ، بس ..لا .. كله الا الرمرمة ، والأكل المكشوف والملموم عليه دبان ، ودي شكلها لسه خارجة من خناقة بكمية الاصباغ اللي على وشها...،

ومع تطور النظرات ، تطورت الحركات ، والتلميح أصبح تصريح ، وأصبح الموضوع لا ينسكت عليه أبدا .

أنا: ما تحترمي نفسك يا ست انت ، انت مش حاسة بنفسك ، والا انت فاكرة نفسك ست!؟ والله انا لولا احترامي لطهقانة ، انا كنت طردتك من بيتي .! عالم معندهاش احساس بالمسئولية، ياااا طهقااانة..ماتيجي تشوفي ضيوفك .

- انت راجل ماعندكش ذوق
- انت ست معفنة
- راجل معندكش نظر ومش بتقدر
- انا مش شايف أي حاجة تتقدر
- أنا اللي غلطانة إني...
- طبعاً هو واحدة زيك تعمل حاجة مش غلط .
- احترم نفسك ، انت مابتعرفش تعامل الستات.

- هما فين الستات...! دا انت بالكتير انثى الكركدن

- قليل الادب
- انا مش عارف طهقانة إزاي تصاحب ستات أرجوزات زيك

- طلقني ...خسارة فيك النيو لوك !
- مين .....! طهقانة ؟

___________________________

تحديث :

مازال مسلسل سرقات المواضيع ونسبها إلى الغير مستمرة .،

لقد تم نقل الموضوع هذا بالحرف إلى :

1- منتدى العكسة للكاتب سما العطشان اللي أشار على استحياء في نهاية الموضوع انه (منقول)

والاخ سما العطشان دمه خفيف خالص.. حاطط هذا التحذير في كل مواضيعه

.
2- منتدى ATsharaing للكاتب فارس الحسناء الذي عجبته الحكاية وأخد كل مواضيعي ، ولم يكلف خاطره بإضافة كلمة(منقول) واخد يتلقى التهاني والتبريكات والحركات على انه كاتب الموضوع ، ولم يقر بالحقيقة إلا لما دخلت له المنتدى وسألته بالمفتشر... وأخيرا قر واعترف.
.
3- منتدى الجياش للكاتبة nanees اخذت نفس الموضوع ، بس بدون قصد ، ورجعت نسبت الموضوع لأصوله..فلها الشكر .
4- منتدى قمة النت للكاتبة شاهي ..مشرفة قسم المرأة ، واخدة كذا موضوع لي ولطهقانة ، بدون ذكر منقوووول.
5- منتديات شبكة المنهدس ، ومشرفة المنتدى العامة أوزوريس ، بكل افتخار تنقل المواضيع وتضرب طناش ،
بس بعدما تأكدت انها من عندنا ، لم تأخذها العزة بالإثم ، وارسلت رسالة توضح موقفها الذي تقبلته ، فلها جزيل الشكر ، ولها الحق في النقل بعد ذلك كيفما شاءت.
.
يعني الواحد يقعد يفكر إلى أن تتحرق بنات افكاره لغاية ما يكتب الموضوع ، وفي الاخر ياخدها بكل سهولة ويحطها في جيبه وكأنها كانت مرمية على النت مالهاش صاحب، والمشرفين على المنتديات لهم تعليق واحد ( وفيها ايه ، ماكلنا بننقل، خلي الناس تانبسط يا زينب)
قلة ..... ، وحاجة تحرق الدم

Posted by طهقان :: 10:49 AM :: 104 Comments:

Post a Comment

---------------------------------------